Air Astana әуекомпаниясы Израильге Алматы — Тель-Авив — Алматы бағыты бойынша бір рейс орындауды жоспарлап отыр, — деп хабарлайды Tengritravel.kz тілшісі Азаматтық авиация комитеті баспасөз қызметіне сілтеме жасап.
«10 қазанда «Эйр Астана» әуе компаниясы қазақстандық азаматтарды Израильден алып қайту бойынша Ақтау қаласына техникалық қону арқылы Алматы-Тель – Авив-Алматы бағыты бойынша КС–6490/6500 рейсін орындауды жоспарлап отыр», — делінген хабарламада.
Алматы қаласынан ұшу сағат 08:00-ге, Тель-Авив қаласынан ұшу жергілікті уақыт бойынша сағат 12:50-ге жоспарланған.
Қазіргі уақытта «Эйр Астана» әуе компаниясының ақпараты бойынша Тель-Авив қаласының әуежайы тарапынан әуежайға рейстің келу және ұшу уақытын келісуі күтіледі. Барлық сұрақтар бойынша әуе компанияның help.airastana.com қолдау орталығына хабарласу қажет, тел.: +7 (727) 244 44 78 (қоңыраулар үшін) және +7 702 702 0074 (WhatsApp).
Қазақстанның Тель-Авивтегі елшілігінің мәліметінше қазіргі уақытта Израильде еліміздің 400-ден аса азаматы бар. Олар консулдық тіркеуінде жоқ.
«Эйр Астана» мәліметінше, Израильдегі жағдай шиеленіскен жағдайда рейстер орындалмауы мүмкін.
Айта кетейік, 7 қазанда Израиль қалаларына Газа секторынан зымыран атқылады. Болжаммен екі мыңнан аса зымыран атылған.
